Páxina Principal | Contacte con Nos | Mapa Web

inicio concello servizos biblioteca galería local social museo informaciónturismo

Roteiros

Roteiro de Garfián

As augas dos ríos en Beariz corren cara o sur, caro río Avia, en lugar de ir cara o Suroeste como no resto da comarca. Os vales son abertos e de orientación sur, con máis horas de sol e lixeiramente máis cálidos que os veciños do Norte. O roteiro de Garfián rodea o monte do Ceo da Bouza para baixar atravesando a agradable área recreativa de Barcia.

O roteiro de Gafián é un agradable paseo de oito quilómetros polo centro e sur do Concello de Beariz que vai discorrendo entre subidas e baixadas entrelazadas. A sombra acompaña nos primeiros e últimos quilómetros mentres na zona alta as vistas panorámicas adquiren o protagonismo.

O roteiro permite coñecer a maioría de elementos característicos de Beariz como pequenas aldeas, antigos xacementos megalíticos e agradables zonas para descansar á sombra xunto a regatos.

Todo o percorrido é transitable a pé, en bicicleta de montaña ou quad. No caso dos todoterreos será preciso dar un rodeo na Aldea da Bouza. Non se colle o camiño marcado á dereita, que é estreito, seguindo de frente ata atopar unha pista máis ampla á dereita pola que subiremos atentos para atopar as sinalizacións da ruta. Ao chegar ao depósito de auga hai que coller cara á esquerda pola pista que sobe pouco a pouco e que xa está sinalizada.

Garfián é unha pequena e recollida aldea na parte do Sur de Beariz. Conta cunha casa rural e está rodeada de fragas de carballos e castiñeiros principalmente. A orientación ao sur e protección das pequenas montañas soe ofrecer un clima soleado e pouco ventoso.