Páxina Principal | Contacte con Nos | Mapa Web

inicio concello servizos biblioteca galería local social museo informaciónturismo

Roteiros

Roteiro de Alvite

A ruta que se presenta lévanos a rodear un val por cuxo centro vai o regato coñecido como da Ponte Pedriña. Este regato desembocará no Avia, un caudaloso río destacable pola pesca, historia e riqueza natural. O Avia rega o Ribeiro, comarca Ourensá famosa polos seus viños, e desembocará máis ao sur no Miño, o gran río vertebrador da orografía galega. Aínda que o regato é aquí pequeno, achega humidade suficiente para que aparezan ante nós importantes bosques de ribeira cunha fenomenal riqueza de flora e fauna.

Entre as rutas de sendeirismo no concello de Beariz destacamos que esta é case sempre baixo a sombra de árbores, facilitando así que o paseo sexa máis agradable. Só a parte alta do quilómetro 2 ao 4, na Chancela, presenta un arborado máis escaso aparecendo en troques a posibilidade así de disfrutar das vistas das aldeas e montes de case todo o concello. A parte profunda do val, sobre todo cara ao final do percorrido, irá amosando sempre gran fertilidade co dominio do Bidueiro, o Carballo e o Piñeiro. Setas, insectos, paxaros e mesmo mamíferos poderán ser divisados tamén no decurso da ruta.

Os 12,8 quilómetros pódense facer a pé, en bicicleta ou en todo terreo. No caso do todo terreo só se atoparían dificultades para transitar, case ao final, polo tramo dende a área recreativa de Barcia, que podería facerse por estrada como alternativa.

Alvite é unha aldea entre Lebozán e Muradás na que a frondosidade das carballeiras que a rodean e a rehabilitación dos últimos anos fan que sexa un lugar imprescindible a visitar. A Zapatería de Tío Ramiro é unha casa rural que ofrece tamén servizo de comidas, ideal como aloxamento de calidade, nun lugar tranquilo en plena natureza.

Proponse unha ruta de 12 quilómetros pero existe tamén un sendeiro alternativo que baixa entre carballos e flora típica de río ata a area recreativa de Barcia. Nesta aldea floreceron algunhas actividades artesanais e comerciais como se pode ver no nome dalgunhas das casas que recordan a actividade á que se dedicaron orixinariamente.